“Türkiyə və Azərbaycan İş Adamları və Sənayeçiləri İctimai Birliyi” (TÜİB) və “Azərbaycan Türkiyə İş Adamları Birliyi” (ATİB) təşkilatlarının üzvlərindən ibarət nümayəndə heyəti Sumqayıt Texnologiyalar Parkında (STP) olub.

Bu barədə Leqal.info-ya Sumqayıt Texnologiyalar Parkının (STP) mətbuat xidmətindən məlumat daxil olub.

Əvvəlcə qonaqlara STP haqqında ümumi məlumat verilib. Nümayəndə heyətinin istehsal prosesi ilə yaxından tanış olması üçün müəssisələrə ekskursiya təşkil edilib. İstehsal müəssisələrinin arasında Kabel zavodu, Polimer məmulatlar zavodu, Qaynar Sinkləmə zavodu və Ağır Maşınqayırma zavodu qonaqların xüsusi marağına səbəb olub. İstehsal olunan məhsullar haqqında geniş məlumat verilib, bildirilib ki, istehsal imkanlarına görə STP nəinki Azərbaycanda, hətta MDB regionunda qabaqcıl şirkətlərdən biridir. Belə ki, STP-nin istehsal etdiyi bəzi xüsusi məhsullar vardır ki, onların istehsalı dünyada çox az ölkədə təşkil olunmuşdur. İstehsal sahələrinin ekskursiyası zamanı qonaqları maraqlandıran çoxsaylı suallar mütəxəssislər tərəfindən ətraflı cavablandırılıb. Bildirilib ki, 2009-cu ildən fəaliyyət göstərən Sumqayıt Texnologiyalar Parkında hazırda 13 zavod və 25-dən artıq istehsal sahəsi fəaliyyət göstərir. Yaradılmış istehsal sahələri və istehsal edilən məhsullar Azərbaycan iqtisadiyyatının qeyri-neft sektorunun inkişafını nümayiş etdirir və gələcək inkişafı üçün böyük imkanlar yaradır.

Daha sonra STP-nin baş direktorunun birinci müavini Kamran Abbasovun iştirakı ilə geniş tərkibli görüş keçirilib. Təşkilatlara üzv şirkətlərlə gələcəkdə əməkdaşlıq əlaqələrinin qurulması və inkişafı məsələləri müzakirə olunub. Qonaqlar STP-nin istehsal gücünün onlarda böyük maraq oyatdığını, xüsusən xarici bazarlara çıxış üçün böyük imkanların olduğunu vurğulayıblar.

Baş direktorun birinci müavini çıxışı zamanı STP ilə təşkilatlara üzv şirkətlər arasında əməkdaşlıq əlaqələrin qurulmasından və daha da genişləndirilməsindən yana olduqlarını qonaqların diqqətinə çatdırıb. Qeyd edib ki, STP-nin tərkibində olan müəssisələr istehsal etdiyi yüksək keyfiyyətli, beynəlxalq standartlara cavab verən məhsulları və xidmətləri ilə istənilən layihədə uğurla iştirak etməyə hazırdır.