Mətbuatdan da bəlli olduğu kimi, bu çətin sınaq dövründə seçicilərini tək qoymayan deputatlardan biri də 31 saylı Suraxanı İkinci Seçki Dairəsindən millət vəkili seçilmiş Etibar Əliyevdir.
Leqal.info xəbər verir ki, millət vəkili Yeni Günəşli və Qaraçuxur sakinlərinin problemləri ilə yaxından maraqlanır, aztəminatlı ailələrin ərzaq probleminin həlli istiqamətində zəruri addımları atır. Millət vəkilinin növbəti təqdirəlayiq addımı isə Yeni Günəşli qəsəbəsinin sakininə etdiyi köməkliklə bağlıdır. Bu barədə saytımıza 31 saylı Suraxanı İkinci Seçki Dairəsindən deputatlığa keçmiş namizəd, jurnalist Pərvin Mahmudov məlumat verib. O bildirib ki, Yeni Günəşli qəsəbəsi V massivində yaşayan rusdilli ailə, Ryadinskaya İrina ona telefon açaraq qaz və telefon probleminin olduğunu dilə gətirib: “İrina xanımın problemini dinlədikdən sonra hörmətli millət vəkili Etibar Əliyevlə əlaqə saxladım. Etibar müəllim çox sağolsun, rusdilli ailənin probleminə biganə qalmadı. Məhz onun müdaxiləsindən dərhal sonra ailənin həm telefonu düzəldi, həm də qaz sayğacında yaranmış problem aradan qaldırıldı. Saytınız vasitəsilə həm Etibar Əliyevə, həm də Suraxanı rayon Qaz İstismar Sahəsinin, Suraxanı rayon Telekommunikasiya Qovşağının rəhbərliyə dərin təşəkkürümü bildirirəm. Hazırkı dövrdə hər birimiz bir olmalı, yardıma ehtiyacı olan insanlara dəstək durmalıyıq”. Biz də sayt olaraq bu cür həssas dönəmdə vətəndaşların yanında olan millət vəkilləri və əlaqədar dövlət qurumlarının rəhbərlərinə sağol deyirik.
