Penitensiar Xidmətin ictimaiyyətlə əlaqələr şöbəsindən APA-ya verilən məlumata görə, ədliyyə naziri, birinci dərəcəli dövlət ədliyyə müşaviri Fikrət Məmmədovun imzaladığı əmrə əsasən, Penitensiar xidmətin kadr korpusunun komplektləşdirilməsi məqsədilə gənc namizədlər orta rəis heyətində qulluğa qəbul edilib.
Xidmətə qəbul üçün müəyyən edilmiş və keçirilmiş müsabiqələrdə uğur qazanmış 37 nəfər gənc namizədə xüsusi rütbələr verilib və orta rəis heyətinə xidmətə qulluğa başlayıblar.
Gənc əməkdaşlarla görüşən Kadrlar idarəsinin rəisi, ədliyyə polkovniki Əflatun Məmmədov onlara ədliyyə nazirinin müavini - Penitensiar xidmətin rəisi ədliyyə general-mayoru Ceyhun Həsənovun xidmətə qəbul olunmaları münasibəti ilə təbriklərini çatdırıb, gələcəkdə çətin və şərəfli fəaliyyətlərində vətəndaş hüquq və azadlıqlarına hörmət, qanunçuluq, humanizm, qərəzsizlik prinsiplərinə dönmədən riayət etmək, dövlət idarəçiliyinin mühüm sahələrindən biri olan ədliyyə orqanlarında vicdanla, dövlətə və xalqa sədaqətlə xidmət etmək, ədliyyə işçisi adını daima uca tutmağı tövsiyə edib.
