Azərbaycan Şahmat Federasiyasının təşkilatçılığı və “Azərloteraya”nın baş sponsorluğu ilə 22 iyul - Milli Mətbuat Gününə həsr olunan jurnalistlər arasında şahmat yarışının açılış mərasimi keçiriləcək. Tədbirdə rəsmi şəxslər, siyasətçilər və digər tanınmış qonaqlar iştirak edəcəklər.

Leqal.info xəbər verir ki, “Cinema Plus”da baş tutacaq açılış mərasimindən sonra yarışın püşkatması keçiriləcək, iştirakçılara qaydalar barədə məlumat veriləcək.
Çempionatın qalibləri Milli Mətbuat Günü ərəfəsində mükafatlandırılacaqlar.
İlk üç yeri tutacaq komandaların hər bir üzvünə pul mükafatı, sponsorlardan qiymətli hədiyyələr və diplom təqdim olunacaq. Eyni zamanda, bağlanış mərasimində təşkilat komitəsi xüsusi nominasiyalar üzrə qalibləri elan edəcək.
Jurnalistlər arasında şahmat çempionatı ilk dəfə olaraq komanda şəklində baş tutacaq. İki nəfərdən ibarət olacaq komandalar püşk nəticəsində müəyyənləşəcək. Turnirin yarış günləri 9 və 16 iyulda təşkil olunacaq.